Park Naturali ta Xrobb l-Ghagin

Iċ-Ċentru ta’ Riabilitazzjoni tal-Ħajja Selvaġġa li jinsab fi Xrobb l-Għaġin ġie żviluppat minn Nature Trust Malta, b’kollaborazzjoni ma’ Ambjent Malta, b’investiment ta’ €2.5 miljun kofinanzjat mill-Fond Ewropew għall-Iżvilupp Reġjonali. Dan jipprovdi faċilitajiet għar-riabilitazzjoni ta’ organiżmi selvaġġi, inkluż fawna marittima, terrestri u avjarja, u joffri santwarju għall-irkupru tagħhom qabel l-introduzzjoni mill-ġdid fil-ħabitats tagħhom. Programm Edukattiv immexxi minn Ambjent Malta jippromwovi kuxjenza ambjentali permezz ta’ outreach fl-iskejjel, tħawwil tas-siġar u konservazzjoni prattika. L-attivitajiet fil-park u fiċ-Ċentru ta’ Riabilitazzjoni tal-Ħajja Selvaġġa jinkludu tours gwidati u sessjonijiet interattivi fuq il-bijodiversità u s-sostenibilità. In-Nature Stewards ta’ Ambjent Malta jippromwovu l-programm, waqt li jagħtu s-setgħa lill-gruppi ta’ età kollha biex jieħdu rwol attiv fil-protezzjoni tal-ambjent naturali ta’ Malta.