Direttorat tal-Proġetti Ambjentali

Id-Direttorat tal-Proġetti Ambjentali fi ħdan Ambjent Malta huwa responsabbli għad-disinn u l-implimentazzjoni tal-proġetti mwettqa mill-organizzazzjoni. L-implimentazzjoni tal-proġetti jew tiġi esternalizzata permezz ta’ akkwist pubbliku (Public Procurement), jew titwettaq permezz ta’ kollaborazzjoni ma’ NGOs jew permezz ta’ implimentazzjoni diretta mill-uffiċjali pubbliċi impjegati minn Ambjent Malta.

L-attivitajiet ewlenin fi ħdan dan id-Direttorat huma l-manutenzjoni tas-siti ta’ Natura 2000, l-inizjattivi ta’ restawr tal-ħabitats u l-attivitajiet ta’ protezzjoni tal-baħar. Il-proġetti ta’ restawr tal-ħabitats imwettqa f’żoni li huma protetti u/jew ta’ valur għoli ta’ konservazzjoni huma bbażati fuq il-kunċett tal-ekoloġija tar-restawr. Il-veġetazzjoni indiġena titħawwel skont il-karatteristiċi speċifiċi għas-sit taż-żona, inkluż il-fitosoċjoloġija, jiġifieri l-komunità eżistenti ta’ pjanti li jikbru f’kundizzjonijiet stabbiliti speċifiċi għas-sit partikolari. L-ambitu ta’ tali proġetti huwa li jinkoraġġixxu r-riġenerazzjoni naturali fis-siti restawrati u r-riġenerazzjoni potenzjali f’żoni u bijotopi li jinsabu fil-viċinanzi.