Skopri l-Bijodiversità Marittima ta’ Malta Permezz ta’ Snorkel Trails
Skopri l-Bijodiversità Marittima ta’ Malta Permezz ta’ Snorkel Trails
Ambjent Malta qed tieħu l-inizjattiva fil-promozzjoni tal-isnorkel trails ta’ Malta u tinkoraġixxi lill-pubbliku biex jiskopri u japprezza r-rikkezza tal-ambjent marittimu u l-importanza tal-konservazzjoni tiegħu.
L-inizjattiva bdiet fl-2023, meta Ambjent Malta bdiet torganizza attivitajiet gwidati tal-isnorkelling għall-pubbliku fir-Ramla tal-Mixquqa (Golden Bay) u f’Għajn Tuffieħa (Riviera Bay). L-attivitajiet ġew organizzati fuq perjodu ta’ tliet snin, u pprovdew lill-membri tal-pubbliku bl-opportunità li jesploraw l-ambjent marittimu ta’ Malta u jitgħallmu aktar dwar il-ħabitats u l-ispeċi li jinstabu mal-medda tal-kosta.
Ambjent Malta kompliet tibni fuq din l-esperjenza u issa qed tkompli tippromwovi l-isnorkel trails permezz ta’ attivitajiet pubbliċi dedikati fiż-żewġ bajjiet. Dawn l-attivitajiet se jinkoraġġixxu lill-viżitaturi biex jużaw it-trails u l-gwidi diġitali tagħhom, u b’hekk jippermettulhom li jiskopru u jitgħallmu dwar il-bijodiversità marittima li tinstab fiż-żona.
L-isnorkel trails huma mezz effettiv għall-iżvilupp tal-għarfien ekoloġiku u l-inkoraġġiment ta’ involviment akbar tal-pubbliku fil-konservazzjoni tal-bijodiversità marittima u l-proċessi ta’ ġestjoni relatati. Dawn jipprovdu wkoll opportunità li tinħoloq kuxjenza dwar il-ħabitats marittimi sensittivi fiż-Żoni Marini Protetti (MPAs), f’konformità mal-objettivi tal-konservazzjoni u l-miżuri stabbiliti għas-siti marittimi ta’ Natura 2000 ta’ Malta.
It-trails tar-Ramla tal-Mixquqa u Għajn Tuffieħa, li jinstabu fiż-Żona Marina Protetta “Żona fil-baħar bejn Rdum Majjiesa u Għar Lapsi” (MT0000101), oriġinarjament ġew stabbiliti fl-2013 permezz tal-proġett MEDPAN NORTH (2G-MED09-270 MEDPAN NORTH).
Permezz tal-inizjattiva attwali, Ambjent Malta, flimkien mal-Awtorità għall-Ambjent u r-Riżorsi (ERA) u Nature Trust Malta, qed tibni fuq dan il-legat biex tqarreb lit-trails lejn il-pubbliku u tippromwovi apprezzament akbar tal-bijodiversità marittima ta’ Malta.
Skopri t-trails, esplora l-kosta, u tgħallem aktar dwar il-ħajja marittima ta’ madwarna. Il-gwidi diġitali huma disponibbli kemm bil-Malti kif ukoll bl-Ingliż:
Il-Gwida tat-Trail ta’ Ir-Ramla tal-Mixquqa (Golden Bay): Bl-Ingliż | Bil-Malti
Il-Gwida tat-Trail ta’ Għajn Tuffieħa: Bl-Ingliż | Bil-Malti
Aktar informazzjoni fuq is-sit web tal-ERA:Żur is-Sit Web
